عاجل.. أحمد شوبير يكشف مفاجأة بشأن تجديد عقد نجله مصطفى مع الأهلي
كشف الإعلامي أحمد شوبير، تطورات ملف تجديد نجله مصطفى شوبير مع فريق الكرة الأول بالنادي الأهلي خلال الفترة الحالية.
شوبير يكشف تطورات ملف تمديد عقد نجله مع الأهلي
وقال أحمد شوبير في تصريحات عبر برنامج الناظر: ملف مصطفى شوبير كان أسهل ملف وبقى ملف معقرب ومتكهرب؛ لأنه على مدى 3 سنوات سابقة عايزين نجدد، يلا نجدد، وبعدين الكلام يقف، السنة دي، خصوصًا بعد كأس العالم، الكلام بقى جدي جدًا في موضوع التجديد.
وأضاف: حصل كلام وحصل اتفاقات مالهاش علاقة بالماديات خالص، الماديات على الجميع، اللي على مروان، اللي على إمام، اللي على هاني، اللي على ياسر، اللي على مصطفى شوبير، مافيش خلاف في الماديات خالص؛ كل القصة بتاعة مصطفى شوبير هي “الشرط الجزائي” هشرح لكم دلوقتي، لكنه مكانش فيه كلام في الفلوس خالص.
وأوضح أحمد شوبير: مصطفى شوبير متكلمش في الماديات، هو كل اللي وكيله قاله لـ مسؤولي الأهلي “ادوني من 1-6 لـ1-8” اكتبوا لي ما يضمن إذا أتى عرض احتراف محترم لـ الحارس، والوكيل كان عايز بند من نهاية الموسم اللي هو 1-6 لـ 15-8، وبعدين تم التوصل لصيغة اتفاق، إنه يبقى لـ 1-8 وبعدين مسؤولي الأهلي قالوا: لا، 15/7.. وبعدين في الآخر النادي الأهلي قال: لا 1-8 ولا 15-7 ولا حتى 2-6، مفيش شرط جزائي خالص.
وأفاد: محاولة شيطنة اللاعبين أمر مش مستحب؛ لأنه في النهاية دا اللاعب بتاعك وفي النهاية هيجدد معاك، يجدد بكرة، يجدد بعده، يجدد بعد شهر، يجدد بعد يومين، يجدد بعد أسبوعين، في النهاية اللاعب هيجدد معاك؛ لأن اللاعب بيحب النادي وخايف على النادي وعايز أحسن حاجة للنادي، لكن في نفس الوقت، اللاعب نفسه يحترف وجات له فرصة احتراف، محصلش اتفاق فـ تمام، لكن اللي أقدر أقوله إنه هناك شخصية بارزة في الأهلي تدخلت في هذا الأمر، مش عشان الشرط الجزائي، ولكن عشان تطمين وكيل اللاعب.
واستمر شوبير: اللاعب نفسه قال: «أنا تحت أمر النادي»، والأمر ليس له علاقة بالماديات، اللاعب عايزك ومتمسك بيك، ومغضبش ومقالش: «يا إما نادي كومو يا إما بلاش وخلاص» وعارف إنه النادي بيته.
وأكد: هناك شخصية بارزة داخل النادي الأهلي بتقوم بهذا الدور، مش مع شوبير بس، مع ياسر ومع هاني تاني، وبتجعل الأمور تسير في الإطار المناسب، وأنا على يقين، بنسبة ألف في المية، إن التلاتة هيجددوا، والموضوع لن يستغرق وقت، ونهاية الموضوع تجديد إن شاء الله.
وأتم: بطلب من النادي الأهلي إنه يحمي ولاده، ده مهم جدًا، التفاوض في النهاية بينتهي بنجاح، بس اللي ممكن يسيب غصة في القلب أو ضيق أو زعل، إنه تبدأ تتسرب حاجات من الاجتماعات.